Vallivió

En Sarvisé se chunta con as auguas d'o Barranco d'o Chate, que aduga ta Fanlo y a tota a Val de Vió (Vallivió). En realidat, a partir de Fanlo, os lugars abocan auguas a l'Aso y dimpués a lo Bellós, que a la suya vez lo fan a lo Cinca. Por tan, estrictamén fablando, a partir de Fanlo ya no sería cuenca de l'Ara sino d'o Cinca, pero he preferiu incluyir-los por a relación estreita que han teniu con a val. En Vallivió trobamos, amás de Fanlo, os nuclios de Buisán, Nerín, Buerba, Vió y Yeba, toz els felizmén abitaus, y Sercué, Gallisué y Ceresuela ya despoblaus. En ista zona tamién bi ha muitas masadas y pardinas cual nombre no he incluyiu.

Somos en pleno Parque Nacional d'Ordesa y Treserols, recorrendo o Canyón d'Anyisclo picau por o río Bellós. Posiblemén ye una d'as zonas más bellas d'o Pirineu Aragonés. Os lugars mantienen en gran parte l'encanto d'as construccions tradicionals y as vistas sobre Treserols son magnificas.

Sobrepuerto

O río Ara, dende Sarvisé, se calma bella cosa, as pendiens no son tan prenunciadas y a val se va enamplando. Bella cosa más abaixo plegamos a Fiscal, ya en o que yo nombro Ribera Meya de l'Ara.

Pero antes de charrar d'ista zona, imos a aturar-nos en o que queda en a marguin dreita de l'Ara en plegar ta Fiscal. Se trata d'una gran redolada d'estensión pero cuasi completamén despoblada: o Sobrepuerto.

Sobrepuerto ye una comarca entre Sobrarbe y l'Alto Galligo. Comprende, a grosso modo, o rectanglo formau con vertices en Biescas, Samianigo, Fiscal y Broto. Ye una tierra espectacular pero trista. Toz os lugars son abandonaus dende os anyos 60 y 70 (a esceción de Bergua), y a naturaleza ha recuperau ya o que l'ombre entre sieglos le furtó.

Dentrando por a zona de Bielsa, por a pista d'Oliván, trobamos dos nuclios: Bergusa y Ainielle. Beluns no incluyen Bergusa n'o Sobrepuerto, dada a proximitat ta Oliván y a la redolada de l'Alto Galligo. Tampoco Susín, que queda a lo costau d'Oliván.

Ainielle y Bergusa son viellos conoxius ta los lectors. Allí se desembolica a escelén novela curta de Julio Llamazares, "A plevia amariella", que ye un monologo d'o zaguer habitant d'Ainielle, ye decir, d'a despoblación d'istas tierras.

Más a lo este, por a dentrada dende Fiscal, trobamos Bergua (único que ye abitau, anque tamién plegó a despoblar-se en os 70) y Basarán, Escartín y Otal, toz d'o monecipio de Broto. Más a lo sur, Cortiellas, Sasa y Ciellas, d'o de Yebra de Basa. A istos podríanos unir por o norte Ayerbe de Broto y Yosa de Broto, que en principias no se gosan incuyir, en pertenexer a Broto.

Toz els, a esceción de Bergua ya comentau, son desabitaus dende os anyos 60. A dureza d'ista tierra y o dudoso futuro que les asperaba, fació que toz migraran a tierras más amigables.

Ribera Meya de l'Ara

Tornamos a Fiscal y a la Ribera Meya de l'Ara. En ista zona ya no bi ha tantas pendiens y l'ara se torna calmo, fendo as riberas bella cosa más amplas. Allí, por tant, ye más facil l'asentamiento umano y trobamos cuantos nuclios.

O primer ye Fiscal, monecipio d'ista zona, y o más importán (anque no sobresa en muito os 200 abitadors).

A lo suyo costau, bella cosa más a lo sur y pegau a la carretera de Samianigo, ye Lardiés y más alto o despoblau de Berroy.

Cuenca abaixo trobamos, en a marguin dreita y n'iste orgen, Borrastre, Sant Chuste, Ligüerre d'Ara, Albella, Planiello, Sant Felices d'Ara y Chanovas. Toz els son uei abitaus, incluyiu Chanovas que tiene una istoria tremebunda d'abuso umano (no ye puesto ta contar-lo aquí, en iste inte).

Ligüerre, Albella, Planillo y Sant Felices pertenexieron a lo monecipio istorico de Albella-Chanovas. Uei en dia toz pertenexen a Fiscal.

En a marguin zurda trobamos: L'Arresa, Chavierre d'Ara, Santa Olaria d'Ara, La Cort y La Velilla. Santa Olaria nomás tiene una abitadora y La Cort y La Velilla son desabitaus yq que corrioron a mesma suerte que Chanovas y o suyo entibo cocón.

Sin dentrar en detalles, ista zona (y a siguién, a Solana) estió mui afectada por o proyeuto de construción d'un entibo en Chanovas. O proyeuto y a suya afeción s'alargó entre 60 anyos y obligó a muitos nuclios a despoblar-se. A la fin, no se fació, se trataba d'un "entibo de papel" y tot apunta a que Chanovas, La Velilla y La Cort, resurtirán d'as suyas cenisas.

Ta comprender tot isto d'o entibo, recomiendo encareixidamén a lectura d'o libro d'a chenial Marisancho Menjón, "Víctimas de un pantano de papel". Ye agotau pero se puede baixar en PDF dende aquí.
Tamién estaría bueno que escuitaras bella cosa a la Ronda de Boltaña y plegaus. A Ronda siempre ha tanyiu a Chanovas (Boltanya ye a lo costau) con a suya Habanera triste. Francho Sarrablo (d'a Ronda) tamien tiene o suyo Pantano de papel.

A Solana

Por Chanovas, La Velilla y La Cort, n'a marguin zurda de l'Ara, s'ubre un conchunto de barranqueras y mons que aconforman a redolada d'A Solana. Aquí dentramos en depresión: ni un nomás d'os 15 nuclios que la formaban son hue en día abitaus.

A Solana y os suyos lugars estioron tamién victimas d'o entivo de Chanovas. Anque as auguas no los inundaban, os incheniers decidioron que si permanexeba como dica allora, a erosión rastriaría muita tierra que podría colmatar o entivo. Asinas que lo millor yera chitar a tota a chen y reforestar tota a redolada ta emparar a tierra.

Lo cierto ye que no les feba muito insistir a la chen ta que se'n ise. Como en Sobrepuerto, a vida yera mui dura en ixa zona, sin carreteras y cuasi sin pistas, sin luz ni augua corrién. Asinas que os mesmos que la abitaban replantaron con pins os suyos campos y se marchoron.

Ara nomás quedan bellas piedras en os suyos lugars, tot ye selva. Belún va renaxendo gracias a los "okupas jipis" que l'han abitau.

A La Solana se puede aceder, sobre tot, por dos pistas (curiosamén feitas dimpués de l'abandono...) y belatro aceso.

• A primera la prenemos a lo costau de Santa Olaria y nos leva a Tricás, Chinuabel, Muro d'Ara y Sasé (iste cercano ya a Asín). Tamién podemos continar a lo fondo d'a val ta plegar dica Caixol.
• A segunda se prene dende a carretera nacional, pasau Lacort. Leva a Chiral y luego se divide. A la zurda podemos veyer Semolué y Castellar, mesmo alcanzar de nuevo Caixol. A la dreita continamos ta Cheret y Burgasé.
• Si prenemos a pista engudronada que leva a Yeba (en Vallivió), podemos alcanzar Villamana, Sant Martín d'a Solana, Cámpol y Sant Felices d'a Solana
• Ta Puyuelo, nomás podemos ir por camino (prencipia en pista) tomau en La Velilla.

Ribera baixa de l'Ara

Ya imos finalizando o nuestro viache. Auguas abaixo de Chanovas, dezaga de pasar o congosto, alcanzamos a parte zaguera de l'Ara. Somos en una val agún más ampla y calma, do trobamos os nuclios más importants d'a redolada: Boltanya y L'Ainsa.

En l'autualidat, ista zona la componen nomás ixos dos monecipios: Boltanya y L'Ainsa-Sobrarbe, y o suyo territorio ye mui extenso. De feito, yo no he preso toz os datos d'a zona, solamén os más prosimos a lo río.

Pero en a epoca d'os censos de 1934 y dinantes y dimpués, a zona la formaban atros monecipios, ara absorbius: Ainsa, Boltanya, Guaso y Sieste.

Tamién ha cambiau muito a estructura poblacional d'ista redolada. Dinantes o lugar más important, con diferencia respeutive a L'Ainsa, yera Boltanya (en 1900 Boltanya teneba 959 abitadors, fren a los 393 de l'Ainsa; ara, datos de 2023, Boltanya cuenta con 917 y L'Ainsa 1.736); alavez bi heba muitos nuclios minusclos espardius arredol de Boltanya u Sieste, mientres que ara cuasi toz se troban desabitaus.

A población en istos dos nuclios prencipals yera y ye muit distinta por lo que fa a orichen y ocupancia. Somos en una zona más acesible, con millors comunicacions, y más ocupada en servicios que en sector primario, comparando con a resta de nuclios anteriors y tamién a los chicos d'ista redolada.

En os censos de 1934 podemos trobar muitas profesions de servicios en Boltanya, cosa cuasi inexistente en a resta. Tamién a población ye muit influenciada por movimientos migratorios: muitos d'os suyos abitadors no son d'a redolada sino venitos a ella por ixa ofierta de servicios.

U siga, aquí poco apellido aragonés.

Manimenos ye indispensable a visita d'a zona. L'Ainsa ye considerada por muitos a villa más bonica d'Espanya, y cierto que ye fermosa. Pero de tanto decir-lo y vesitar-la, yo me quedo con l'encanto de Boltanya. En fin, cuestión de gustos.

Enumerar toz os nuclios d'a redolada ye laborioso. Son muitos os chicos arredol de Boltanya, muitos ya desabitaus.

Amán de Chanovas, trobamos Aguilar y un poquet más abaixo Ascaso, con o osuyo curioso reloch de sol y a suya Muestra de cine más pequeña del mundo. Pasau Ascaso, plegamos ya ta Boltanya y a los suyo arredol, en un redl de menos de 15 km, trobamos: Cambodarbe, Espierlo, Margudgued, Morillo de Sampietro, Sant Fertús, Seso, Silves (Alto y Baixo), Barranco Fondo, A Valle, Luparuelo, Sant Martín, Sant Velián y Sieste.

Bella cosa más abaixo ye Guaso, con o suyo esconxuradero y a suya ilesia de Sant Salvador, ya en as proximidaz de l'Ainsa.